हुम्लाको सिटिजन्स बैंक सिल कोरोना संक्रमित जिल्ला बाहिर पठाउने तयारी

हुम्लाको सदरमुकाम सिमकोट रहेको सिटिजन बैंक शाखा कार्यालय सिल गरीएको छ । बैंकमा कार्यरत पाँचजना कर्मचारीलाई एन्टिजेन विधिबाट कोरोना परिक्षण गर्दा दुई जना कर्मचारीमा कोरोना संक्रमण देखिएपछि आजबाट सिल गरीएको हो ।

शनिबार दुईजना कर्मचारीमा कोरोना संक्रमण देखिएपछि आज आइतबारदेखि सिटिजन्स बैंक शाखा कार्यालय सिमकोट सिल गर्नुका साथै कारोबार ठप्प भएको बैंकले जानकारी दिएको छ । एक जना महिला र एकजना पुरुष गरी दुई जना कर्मचारीमा कोरोना संक्रमण देखिएपछि दुई दिनका लागी बैंक सिल गरीएको हो ।

एकजना संक्रमितलाई जिल्ला बाहिर पठाउने तयारी

यस्तै एक जना पुरुष कर्मचारीमा देखिएको कोरोना संक्रमणको उपचार यहाँ हुन नसकेपछि उहाँलाई जिल्ला बाहिर पठाउने तयारी भइरहेको सिटिजन्स बैंकका कर्मचारी लालु भण्डारीले जानकारी दिनुभयो ।

संक्रमित कर्मचारीको अवस्था जटिल देखिएपछि हेलिकप्टर मार्फत जिल्ला बाहिर पठाउने तयारी भइरहेको जिल्ला अस्पतालका सूचना अधिकारी भक्ति फडेराले जानकारी दिनुभयो ।

जिल्लामा संक्रमित कर्मचारीको उपचार सम्भव नभएपछि हेलिकप्टर उद्धारका लागी हेलिकप्टर मागको लागी पहल भइरहेको फडेराले बताउनुभयो ।
जिल्ला अस्पताल हुम्लाले जिल्ला स्थित सरकारी तथा गैरसरकारी कार्यालयका कर्मचारी तथा भिडभाड बढी हुने कार्यालयमा कार्यरत कर्मचारीको कोरोना परिक्षण गर्दै आएको जिल्ला अस्पतालका सुचना अधिकारी फडेराले जानकारी दिनुभयो ।