दुई दिनदेखि हवाई उडान प्रभावित

हुम्लामा दुई दिन देखि हवाई उडान अवरुद्ध भएको छ । तराईमा चलेको बाक्लो हुस्सु र सिमकोटमा चलेको हावाहुरीको कारण बुधवार देखी हुम्लाको हवाई यातयात प्रभावित भएको छ ।

बुधबार विहानैबाट हुस्सुले नेपालगञ्ज नखुल्नु र सुर्खेतमा हुम्ला उडान भर्ने हवाई जहाज नभएको कारण हुम्लाको हवाई सेवा प्रभावित भएको हो ।
बुधबार नेपालगञ्जमा बाक्लो हुस्सु र विहिबार सिमकोटमा विहानबाटै हवाहुरी चलेका कारण दुई दिन देखि हवाई सेवा प्रभावित भएको नागरिक उड्डयान प्राधिकरण सिमकोट शाखाका प्रमुख बिष्णु प्रसाद अधिकारीले बताए ।

प्रत्येक दिन बिहान साढे छ बजेदेखि सात बजेभित्र सिमकोट विमान स्थलमा हवाई जहाजहरुले अवतरण गर्ने भएको भएपनि तराईमा चलेका शीत लहर र हुम्लामा चलेको हावाहुरीकै कारण कुनै पनि जहाजले सिमकोटमा उडान नगरेको सिमकोट विमानस्थलले जानकारी दिएको छ ।

विहिबार नेपालञ्जको मौसम सफा भएपनि सिमकोटमा विहानै नियमीत चलेको हावाहुरीले हवाई उडान प्रभावित भएको हो ।

सुर्खेतमा मौसम सफा भएपनि जहाज नभएको कारण उडान हुन नसकेको हो । नेपालगञ्ज र सुर्खेतबाट सीता, समिट, तारा र नेपाल एयरलाईन्सले हुम्लाका लागि उडान भर्ने गर्छन् ।

हुस्सु र हावाहुरीका उडान नहुदा नेपालगञ्ज र सुर्खेतबाट आउने यात्रु मर्कामा परेका छन् भने सिमकोटबाट नेपालगञ्ज र सुर्खेत झर्ने यात्रुहरु पनि सिमकोटमै रोकिएका छन् ।

त्यसै गरि खाद्य ब्यबस्था तथा ब्यापार कम्पनी लिमीटेड कम्पनीको ढुवानी अनुदानको खाद्यान्न, दैनिक उपभोग्य सामान, तरकारी र कार्गोको सामान पनि ढुवानी हुन सकेको छैन् ।