हुम्लामा पुन कोरोना संक्रमितको संख्या शून्य

हिमाली जिल्ला हुम्ला विहिबारबाट कोरोना संक्रमण मुक्त भएको छ । यसअघि कोरोना संक्रमित भएर होम आइसोलेसनमा बस्दै आएका संक्रमितको पीसीआर रिपोर्ट नेगेटिभ आएपछि हुम्ला कोरोना संक्रमण मुक्त जिल्ला भएको हो ।

एकजना सिटिजन्स बैंकका कर्मचारीमा कोरोना परिक्षण गर्दा रिपोर्ट नेगेटिभ आएपछि हुम्ला कोरोनामुक्त बनेको अस्पताल हुम्लाका सिनियर अनमी सरिता बोहराले जानकारी दिनुभयो ।

पुस २५ गते एनिटजेन विधिबाट कोरोना परिक्षण गर्दा सिटिजन्स बैंकका एक जना महिला कर्मचारी सहित अर्का पुरुष कर्मचारीमा समेत कोरोना देखिएको थियो ।

कोरोना देखिएका पुरुष कर्मचारीलाई केही दिन अगाडी जिललाबाहिर काठमाण्डौ लगिएको छ भने महिलाको कोरोना रिर्पोट नेगेटिभ आएसँगै उनि घरफिर्ता हुनुका साथै हुमला कोरोना मुक्त जिल्ला बनेको छ ।

लामो समय कोरोना संक्रमणका हिसावले ग्रीन जोनका रुपमा रहेको हुम्ला जिल्लामा गत असोज यता जिल्ला भरि ९१ जनामा कोरोना संक्रमण देखिएको थियो । ती सबै निको भएर घर फर्किएपछि हाल संक्रमित संख्या शुन्यमा झरेको हो ।

केही दिन अगाडी सिटिजन्स बैंकका दुई जना कर्मचारीहरुमा कोरोना देखिएकोमा एकजनालाई कोरोना संक्रमण जटिल बन्दा काठमाडौं रिफर गरिएको र अर्की एकजना महिला कर्मचारीको परिक्षण गर्दा रिर्पोट नेगेटिभ आएपछि जिल्लामा कोरोना संक्रमितको संख्या पुन शुन्यमा झरेको हो ।

गत असोज ३ गते हुम्लामा पहिलो पटक नेपालगञ्जबाट हवाई जहाजमा आएकी युवतीमा कोरोना देखिएको थियो । त्यसपछि स्वास्थ्यकर्मी, सुरक्षाकर्मी, कर्मचारी, शिक्षक र विधार्थीमा कोरोना संक्रमण देखिएको थियो ।