हुम्लामा पहिलो खोप जिल्ला अस्पतालका डाक्टर लामा सहित २९ जना स्वास्थ्यकर्मीले लगाए

हुम्लामा कोभिड –१९ विरुद्धको ‘कोभिशिल्ड’को पहिलो खोप जिल्ला अस्पतालका डाक्टर टसि आङ्जुक लामाले लगाएर शुभारम्ब गरेका छन् । आज पहिलो दिन डाक्टर लामा सहित २९ जना स्वास्थ्यकर्मीले खोप लगाएका छन् । सरकारले पहिलो चरणमा कोरोना खोप स्वास्थ्यकर्मी तथा सरसफाइकर्मी लगायत कोभिड १९ महामारीविरुद्धको लडाइँमा अग्रभागमा खटिएकाहरुलाई लगाउने निर्णय गरेपछि हुम्लामा पहिलो खोप डाक्टर लामा र अर्का डाक्टर नविन रोकाया सहित अन्य स्वास्थ्यकर्मीले लगाएको जिल्ला अस्पताल हुम्लाले जानकारी दिएको छ ।

खोप लिएपछि डाक्टर लामाले संसारलाई हायलकायल बनाएको कोरोनाविरुद्धको खोपको प्रतीक्षामा सबै स्वास्थ्यकर्मी रहेकामा महामारी शुरु भएको एक वर्षभित्रमा खोप प्राप्त भएपछि सरकारप्रति सकारात्मक सन्देश जाने विश्वास आफूले लिएको बताए । ‘भ्याक्सिन लगाएपछि केही अप्ठ्यारो अनुभव भएको छैन, कोभिड–१९ विरुद्धको अभियानमा सबैभन्दा अत्यावश्यक भ्याक्सिन पाएपछि हामी सबै स्वास्थ्यकर्मी उत्साहित भएका छौँ ।

आज उद्घाटनमा पहिलो दिन २९ जना स्वास्थ्यकर्मीले खोप लगाएका छन् भने भोलीबाट समयानुकुल मिलाएर सातवटै गाउँपालिकाका कर्मचारीलाई समेत लगाइने भएको जनाइएको छ । यस्तै आज लगाउन बाँकी रहेका जिल्ला स्वास्थ्य सेवा कार्यालयका कर्मचारी र जिल्ला अस्पतालका कर्मचारीलाई भोलीबाट लगाउन शुरु गरीने भएको लामाले बताए ।

हुम्लामा स्वास्थ्यकर्मी बाहेक अन्यलाई खोप लगाउँदा अवान्छित घट्ना हुन सक्ने र साइड इफेक्ट भएर समस्या निम्तीयो भने ग्रामिण बस्तिहरुमा यस सम्बन्धिका विज्ञ डाक्टरहरु नहुँदा सदरमुकाम सिमकोटमा रहेको जिल्ला अस्पताल हुम्लालाई नै खोप केन्द्र बनाएर लगाइने भएको छ । कर्णाली प्रदेश सरकारले हुम्लाका लागी करीब एक हजार नौ सय कोडिशिल्ड खोप उपलब्ध गराएको छ ।

हुम्लामा जिल्ला अस्पताललाई एक मात्र खोप केन्द्र बनाइएको र पहिलो चरणमा सम्पूर्ण सरकारी, गैरसरकारी, स्वास्थ्यकर्मीहरु, महिला स्वास्थ्य स्वयंसेविका र अस्पतालको फोहोरमैला व्यवस्थापनमा खटिने कर्मचारी गरी एक हजार नौ सय जनालाई खोप दिइने भएको डाक्टर लामाले जानकारी दिए ।