हुम्लामा चार दिनमा ८९ जनाले लगाए कोभिशिल्ड खोप

भारत सरकारले नेपाल सरकारलाई उपलब्ध गराएको कोभिड १९ विरुद्धको कोभिडशिल्ड खोप हुम्लामा चार दिनको अवधीमा ८९ जनाले लगाएका छन् । माघ १४ गतेबाट नेपाल सरकारले देशभमर एकसाथ कोरोना विरुद्धको खोप लगाउने कार्य शुरु गरेसँगै हुम्लामा पहिलो दिन २९ जना, दोस्रो दिन दश जना, तेस्रो दिन २० जना र आइतबार चौथो दिन ३० जनाले खोप लगाएको जिल्ला अस्पतालका सूचना अधिकारी भक्ति फडेराले जानकारी दिए । कोरोना महामारीको समयमा अग्रपंतिमा खटिने स्वास्थ्यकर्मी, स्वयम सेविकाले पहिलो चरणको खोप लगाइरहेको बताइएको छ ।

जिल्लामा आइपुगेको उक्त खोप पहिलो चरणमा स्वास्थ्य सेवा कार्यालय अन्तर्गतका सबै चिकित्सक तथा स्वास्थ्यकर्मी र सम्वन्धित कर्मचारीलाई लगाउनुका साथै सम्पर्कमा आएका स्थानीय तहमा कार्यरत स्वास्थ्यकर्मी तथा स्वयम सेविकालाई लगाउन कार्य भहिरहेको बताइएको छ । हुम्लामा प्रदेशबाट १ सय ७३ भाईल खोप आएको र यसबाट एक हजार सात सय डोज भ्याक्सिन दिन सकिने जिल्ला स्वास्थ्य सेवा कार्यालय हुम्लाले जानकारी दिएको छ । स्वास्थ्य सेवा कार्यालय र सात वटै गाउँपालिका गरि ३२० जना चिकीत्सक तथा स्वास्थ्यकर्मी र २४४ जना स्वास्थ्य स्वयम सेविका गरि ५६४ जनालाई पहिलो चरणमा खोप दिइने भएको छ ।

भ्याक्सिनलाई मौज्दात गर्न समस्या भएको कारण हुम्ला जिल्लामा एकवटा मात्र खोप केन्द्र निर्धारण गरिएको छ । जिल्लामा पुगेको खोप अनुसार स्वास्थ्यकर्मी कोभिड भ्याक्सिन लगाउन उपस्थित नभएको बताइएको छ । भौगोली विकटताका कारण समयमैखोप लगाउन नसकिएको हो । पहिलो खोप चिकित्सक टसी आङ्जु लामाले लगाएका थिए ।