हिमपातले हवाई सेवा अवरुद्ध

हिमाली जिल्ला हुम्लामा विहिबार राति देखि हिमपात हुँदा आज विहान देखि अन्तर जिल्ला जोड्ने एक मात्रै हवाई यातायत अवरुद्ध भएको छ । विहिबार राती १२ बजेदेखि जिल्लामा हिमपात हुँदा सिमकोट विमानस्थल अवरुद्ध भएको हो ।

विहान विमानस्थलको धावनमार्गमा जमेको बाक्लो हिउँ दिउँसो गाडीले पन्छाएपनि निरन्तर हिमपात र हावाहुरीका कारण नेपालगञ्ज सुर्खेतबाट उडान हुन नसकेको सिमकोट विमानस्थललले जानकारी दिएको छ । विकट हुम्लाको अन्तर जिल्ला जोड्ने एक मात्रै हवाई यातायत अवरुद्ध हुँदा नेपालगञ्ज र सुर्खेतबाट जिल्ला पुग्ने यात्रु अलपत्रमा परेका छन् भने हुम्लाबाट जिल्ला बाहिर जाने यात्रु समेत सिमकोटमै रोकिएका छन् ।

यस्तै जिल्लाको उत्तरी क्षेत्रमा रहेको नाम्खा गाउँपालिकामा तललो क्षेत्रभन्दा बढी हिमपात भएको छ । विहिबार रातीको हिमपातले उत्तरी हिल्सामा आवतजावत समेत ठप्प हुनुका साथै चिसो अत्याधिक बढेको सशस्त्र प्रहरी विओपी हिल्साले जानकारी दिएको छ ।

हिँउदको समय कट्नै लाग्दा माघमा परेको हिमपातका कारण गाउँबस्ती मात्र नभई अग्ला हिमाल, डाँडाकाँडा, वनजङ्गल हिउँले सेताम्य र मनमोहक देखिएका छन् भने यहाँका कृषक भने खुसि भएका छन् ।

लामो समयपछि परेको हिमपातका कारण हुम्लाका उत्साहित भएका छन् । मङ्सिरमा छर्केको वालिमा बेलाबेलामा पानीको आवश्यक पर्ने हुँदा हिउँदको समयमा वर्षात र हिमपात नहुँदा खडेरीले भोकमारीको चिन्ता गरीरहेका कृषकलाई राहत मिलेको छ ।

अग्ला गाउँबस्तीमा हिमपात र अली होचा गाउँबस्तीमा वर्षात् भएपछि जिल्लाभरिका कृषक खुशी हुनुका साथै जेठासीवालीका लागि राम्रो हुने विश्वास लिएका छन् ।

जिल्लाभरि नै बिहीबार रातिदेखि शुरु भएको वर्षातसँगै भएको हिमपातका कारण गहुँ, जौ, र उवा लगायतका अन्नबाली सप्रिनुका साथै उत्पादनमा समेत वृद्धि हुने आशा गरिएको अदानचुली गाउँपालिका वडा दुईका जीवन बुढाले बताए ।