गुणस्तरीय स्टीम जिरा चामल हुम्ला आईपुग्यो

खाद्य व्यवस्था तथा ब्यापार लिमिटेड कम्पनीले हुम्ला जिल्लामा पहिलो पटक स्टीम जिरा चामल आपूर्ति गरेको छ । राम्रो चामल भित्र पर्ने उक्त चामललाई लिमिटेडको हुम्ला शाखाको प्रयासमा सो चामल भित्र्याउन सफल भएको छ । पहिलो पटक कर्णालीका साविकका जिल्लामा भित्रिएको स्टीम जिरा चामल हुम्ला जिल्लामा पनि आइपुगेको लिमिटेड हुम्ला शाखाका नायव सुब्बा भरत अधिकारीले बताए ।

राम्रो गुणत्मक चामल ल्याउन भने शाखाले निक्कै प्रयास गर्नु परेको बताए । उक्त चामल शहरी तथा सुगमका जिल्लामा मात्र यसअघि जाने भएपनि अहिले भने लिमिटेडका सबैभन्दा बढी खाद्यान्न आपूर्ति हुम्लामा पनि भएको छ । लिमिटेडले जनतालाई प्रतिकेजी ८२ रुपियाँ र कर्मचारीलाई प्रतिकेजी ८५ रुपियाँ मुल्य निर्धारण गरेको छ । हुम्लामा पहिलो पटक आई पुगेको उक्त चामल बिक्री पनि सुरु गरेको लिमिटेडले जनाएको छ ।

हालसम्म सो चामल सुर्खेत नेपालगंजबाट ६ सय ३८ क्वीन्टल आई पुगेको र अरु पनि आउने क्रम जारी रहेको उनको भनाई छ । यसअघि हुम्लामा उसिना, अरुवा र जापनिज चामल मात्र आउने गरे पनि यो पटकबाट अलिक स्वादिष्ट हुने चामल पुगेको नायव सुब्बा अधिकारीले बताए ।