थुनुवालाई कोभिड विरुद्धको खोप

जिल्ला कारागारमा रहेका सात जना थुनुवा तथा पुरपक्षलाई आज कोभिड विरुद्ध खोप लगाएका छन् । स्वास्थ्य सेवा कार्यालय हुम्लाले कारागारभित्र रहेका सातजना थुनुवा तथा ५५ जना सुरक्षाकर्मी गरेर ६२ जनालाई शनिवार मात्रै कोभिड खोप लगाइएको हो ।

कारगारभित्र रहेका सबै सातजना थुनुवा तथा पुरपक्षका साथै नेपाल प्रहरी,सशस्त्र प्रहरी, र अनुसन्धानका कर्मचारीले पनि कोरोना खोप लगाएको जिलला स्वास्थ्य सेवा कार्यालय हुम्लाका मान बहादुर रोकायाले जानकारी दिनुभयो । शुक्रबार १७ जना नेपाली सेनालाई कोभिड लगाइएको हो ।

कारागारभित्र रहेका थुनुवा तथा पुरपक्षलाइ कोरोना भाइरस संक्रमणको जोखिम बढी हुने भएकोले खोप दिइएको रोकायाले जानकारी बताउनुभयो । ‘कोरोना विरुद्धको खोप लगाइसकेपछि कोरोना संक्रमणको जोखिम कम हुने भएकोले हामीले जिल्ला प्रहरी कार्यालयसँगको समन्वयमा खोप लगाएका हौँ’, स्वास्थ्कर्मी रोकायाले भने । कारगारभित्र रहेका थुनुवा तथा पुरपक्षहरुले कोभिड विरुद्धको खोप लगाउन पाउँदा सबै हर्षित भएका छन् ।

आजबाट पहिलो चरणको कोरोना विरुद्धको कोभिड खोप लगाउने अभियान सम्पन्न भएको छ । सरकारले अग्रपंति भागमा खटिने स्वास्थ्यकर्मी, सुरक्षाकर्मी, सरसफाईकर्मी तथा महिला स्वयम सेविकालाई माघ १४ गतेबाट पहिलो चरणको खोप अभियान शुरु गरेर आजबाट सम्पन्न भएको हो ।