चिसो छल्ने बाहानामा जिल्ला बाहिर गएका कर्मचारी नफर्कदा सेवाग्राही मर्कामा

उत्तरी नाम्खा गाउँपालिका भित्रका अधिकांस कर्मचारीहरु हालसम्म बिधामा बसेपछि सेवाग्राही मर्कामा परेका छन् ।
शैक्षिकसत्र फागुनदेखि शुरु हुने भए पनि यो वर्ष कोरोनाका कारण पठनपाठनमा समस्या भएको भन्दै जिल्लाका अधिकांस विद्यालयहरु पुस महिनाबट शुरु गर्ने गरेका छन् ।

हिमाली जिल्ला हुम्लामा हिमपात र चिसो अत्याधिक हुने भएकाले चिसो छल्न जिल्ला बाहीर गएका नाम्खा गाउँपालिकाका कर्यरत सबै कर्मचारी पालिकामा नआउँदा स्थानिय सेवाग्राहीलाई समस्या भएको स्थानिय पेमा लामाले बताए ।
उनले भने गाउँपालिकामा हालसम्म कुनै पनि कर्मचारी नभएपछि विभिन्न किसिमका सिफारीस लिनका लागि एक दुई दिन लगाएर गाउँपालिका कार्यालय पुगेका सेवाग्राहीहरु रित्तो हातमा घर फर्कनु परेको बताउँछन् ।

विरामीहरु उपचारका लागि स्वास्थ्य संस्थामा पुग्दा स्वास्थ्यकर्मी समेत नभएको भन्दै सदरमुकाम सिमकोट धाउनु परेको लामाको गुनासो छ ।
त्यस्तै पठनपाठन गर्न विद्यालयमा पुगेका विद्यार्थीहरु पनि रित्तै फर्केका छन् । नाम्खा गाउँपालिकामा कार्यरत स्वास्थ्यकर्मी, वडा सचिव, शिक्षक लगायतका कर्मचारीहरू जाडो छल्न तराई झर्ने गरेका छन् ।

गाउँपालिकामा कर्मचारी उपस्थिती नभएपछि तिन दिनभित्र कामकाजमा फर्किन गाउँपालिकाले पत्राचार गरेको छ ।
जिल्लामा भारी हिमपातपछि घर बिदामा बसेका कर्मचारीलाई कामकाजमा फर्किन गाउँपालिकाले पत्राचार गरेको गाउँपालिकाका निमीत्ता कार्यकारी प्रमुख पठन बुढाले बताए ।

यो बर्ष कोरोना र चिसोको कारण विद्यार्थीको पढाइमा बाधा पुगेपछि तिन दिन भित्र सबै कार्यरत कर्मचारीलाई हाजिर हुन पत्रचार गरेको गाउँपालिकाका अध्यक्ष विष्णुबहादुर तामाङले बताए ।