छारे झोलुङ्गे पुल जिर्ण, आवत जावतमा समस्या, गाउँपालिका वेखवर

हुम्लाको छारेमा रहेको झोलुङ्गे पुल जिर्ण बन्दा आवत जावतमा समस्या भएको छ । खार्पुनाथ गाउँपालिका र सर्केगाड गाउँ पालिकाको सिमानामा रहेको छारे स्थित झोलुङ्गे पुल जिर्ण हुंदा मानिस तथा घरपालुवा पशुवस्तुलाई आवत जावत गर्न समस्या भएको स्थानीयले बताएका छन् ।

२०४५ सालमा निर्माण भएको सो पुल माथि हालिएका काठका फल्याक कुहिएर जाँदा हाल उक्त पुलमाथि १ सय २० ढुङ्गा राखेर मानिस तथा घरपालुवा पशुवस्तुले ज्यानै जोखिममा राखी आवतजावत गर्नु परेको रिपबाट स्थानीय कुम्विर परियारले बताए । सो पुलको दुवै तर्फ हालिएका फलामका जाली पनि खिया लागेर भाँचिने अवस्थामा रहेको परियारको भनाई छ ।

उक्त पुलबाट खसेर करिव १५ देखि २० सम्म घरपालुवा पशु वस्तु कर्णालीले बगाएर लगेको सोही ठाउँमा होटल व्यवसायी गरेर बसेका ट्वारे रावलले बताए । वेला वेलामा सानो तिनो बजेट सर्केगाड गाउँपालिकाले विनियोजन गरे पनि झारो टर्ने काम बाहेक अन्य विकल्प नभएको स्थानीयले गुनासो गरेका छन् ।

तर उक्त पुलबाट हालसम्म मानविय अप्रिय घटना भने भएको छैन । जिल्लाकै मुख्य पुल भएकाले सम्बन्धीत सरोकारवाला निकायले सो ठाउँमा पुल निर्माण तथा मर्मत गर्नु आवश्यक देखिएको स्थानियको भनाई छ ।