डेढ वर्ष लगाएर सलीसल्लाको चट्टान छिचोलियो

हुम्लाको सर्केगाड गाउँपालिका र चंखेली गाउँपालिका विचमा रहेको कर्णाली करिडोर अन्र्तगत खण्डको असजिलो क्षेत्रमा रहेको सलीसल्ला भीर छिचोलिएको छ । विगत लामो समयदेखि हुम्ला खण्डको चट्टान नेपाली सेनाले छिचोल्ने कार्य गरेपछि मात्रै हाल सफल भएको छ । अति अप्ठ्यारो र चट्टानै चट्टान भएको उक्त क्षेत्रमा रहेको भीर नेपाली सेनाले डेढ वर्षको अवधिमा छिचोल्न सफल भएको हो ।

निक्कै चट्टानै चट्टान भएको क्षेत्र सलीसल्लाको भीर फुटाएर सडक निर्माण गर्न नेपाली सेना सफल भएको सर्केगार्ड गाउँपालिका वार्ड नम्बर ५ का अध्यक्ष कर्णजंग शाहीले बताए । उक्त भीर छिचोलिएसंगै अब सर्केगाड गाउँपालिका पनि राष्ट्रिय सडक सञ्जालसंग जोडिने क्रममा रहेको अध्यक्ष शाहीले बताए ।

नेपाली सेनाले कालिकोटको खुलालुदेखि लैफु कवाडी हुँदै सलीसल्ला खण्डको १ सय २३ किलो मिटर क्षेत्र मध्य सबै भन्दा असजिलो र चट्टानी भागलाई नेपाली सेनाको बिकास निर्माण दलले छिचोल्न सफल भएको सो खण्डका योजना प्रमुख सेनानी मिलन कार्कीले बताए । उनका अनुसार चट्टानको लेवल मिलाउने, गाह्रो लगाउने, ग्याबिन भर्ने काम समेत सुरु भएको छ ।

जुन क्षेत्रमा सेनाले मापदण्ड पुरा गर्ने कार्य हाल गरि रहेको छ । सेनाले निक्कै कष्ट र मिहेनेतका साथ रात दिन नभनी जनशक्ति, मेशिन र बिष्फोट गर्ने कार्य लगातार गरेर भीर छिचोल्न सफल भएको हो । भीर छिचोलिएपछि सेनाले मेशिन पनि भीर पार गरेर सलीसल्लामा काम गर्ने क्षेत्रमा ल्याएको छ । त्यस्तै छ सय मिटर लम्वाई भएको उक्त भीरमा बिष्फोटका लागि कामदारले शरिरमा डोरी बाँधेर भीरमा काम छन् ।

बीस मिटर अग्लोबाट चट्टानलाई बिष्फोट गरेर सडक निर्माण गरिएको छ । अब असजिलो भीरमा ट्रयाक खोल्ने कार्य पुरा भएकोले सेना आफ्नो जिम्माको काम सम्पन्न गर्ने कार्यको नजिक पगेको छ । सेनाले सलीसल्ला भीरमा काम गर्न निक्कै कठिन रहेको बताउदै आएको थियो । माथि भीर र तल कर्णाली नदीमा काम गर्ने जोखिम कामदारलाई थियो ।

तर सहजै रुपमा काम सम्पन्न गर्न सेना सफल भएको उनको भनाई छ । अबको केही समयपछि सेनाले गाडी गुडाउने समेत जनाएको छ । कर्णाली करिडोर अन्र्तगत कालिकोटको खुलालु देखि हुम्लामा सलीसल्ला क्षेत्रसम्मको कुन सडक मध्य कालिकोटमा ४०, बाजुरामा ४४ र हुम्ला जिल्लाको २७ किलो मिटरमा सडक निर्माण कार्य पुरा भएर यातायात सञ्चालन हुँदै आएका छन् ।

हुम्ला खण्डको बालुकुनाबोट सलीसल्लासम्मको १२ किलो मिटरमा सेनाले अन्तिम चरणको निर्माण कार्य गरि रहेको छ । सो क्षेत्रमा चैत्र महिना भित्र ट्रयाक खोल्ने कार्य पुरा गर्ने र असारसम्म गाडी गुडाउन योग्य बनाईने सेनाले जनाएको छ । यसअघि सेना सडक निर्माण कार्य पुरा गरेपछि दक्षिणी हुम्लाका दुई वटा ताँजाकोट र अदानचुली गाउँपालिका राष्ट्रिय सडक सञ्जालसंग जोडिएका थिए ।