पैदल मार्गको ४ हजार क्वीन्टल खाद्यान्न हवाई मार्गबाट ढुवानी गर्न माग

हुम्लाको नाम्खा गाउँपालिकामा खाद्यान्नको समस्या हुने देखिएपछि नाम्खा गाउँपालिकाले हालसम्म ढुवानी हुन नसकेको कोटाको खाद्यान्न हवाई मार्गबाट ढुवानीको ब्यवस्था गर्न माग गरेको छ । रसुवाको केरुङ नाकाबाट तिब्बत हुँदै हिल्सा आउनु पर्ने खाद्यान्न कोरोनाले नाका बन्द हुँदा ढुवानी गर्ने कार्य बन्द हुँदा गाउँपालिकाले हवाई मार्गबाट ढुवानीको ब्यवस्था गर्न माग गरेको हो ।

नाम्खा गाउँपालिकाका अध्यक्ष बिष्णु बहादुर लामाले गाउँपालिकाका लागि केरुङ नाका हुँदै पैदल मार्गबाट खाद्य ब्यबस्था तथा ब्यापार कम्पनी लिमिटेडले ब्यबस्था गरेको चार हजार क्वीन्टल खाद्यान्न नाका बन्द भएपछि ढुवानी हुन नसकेका कारण सो खाद्यान्न अब हवाई मार्गबाट ढुवानी गरेर खाद्यान्न समस्या समाधान गर्न माग गरेका छन् ।

सो खाद्यान्न पैदल मार्गबाट तिब्बत हुँदै हिल्सादेखि याल्वाङसम्म ढुवानी गर्नका लागि सप्लायर्स पनि छनौट भई सकेको थियो । तर त्यो खाद्यान्न हालसम्म पनि ढुवानी हुन सकेको छैन । ४५ रुयिाँमा प्रतिकेजी खाद्यान्न ढुवानी गर्न सकिने भएपछि नाम्खा गाउँपालिकाका लागि लिमिटेडले खाद्यान्न सो मार्गबाट ढुवानी गर्ने गरेको थियो । उत्पादन कम हुने नाम्खा गाउँपालिकामा खाद्यान्न चीनको ताक्लाकोटमा निर्भर रहनु पर्नेमा कोरोना पछि हिल्सा नाका बन्द हुँदा कुनै पनि खाद्य सामग्रि एक वर्ष यता ढुवानी नभएका कारण अब खाद्यान्न समस्या हुने अबस्था आएको छ ।

केरुङबाट ढुवानी हुने अबस्था नरहेकोले गाउँपालिकाको कोटाको खाद्यान्न समयमै हवाई मार्गबाट ढुवानीको ब्यवस्था गर्न गाउँपालिकाका अध्यक्ष लामाले लिमिटेडसंग माग गरेका छन् । सो खाद्यान्न पैदल मार्गबाट ढुवानी हुन सक्ने अबस्था नभएपछि जिल्ला खाद्य व्यबस्था समिति समेत निर्णय गरेर हवाई मार्गबाट ढुवानीको ब्यबस्था गर्न निर्णय गरेर लिमिटेड केन्द्रमा पठाई सकेको लिमिटेडको हुम्ला शाखाका प्रमुख निर्मल कुमार थापाले बताए । लामो समयसम्म चार हजार खाद्यान्न आइ नपुगेछि नाम्खाका स्थानीय नागरिकहरु खाद्यान्न भोकमारीको चपेटामा पर्न सक्ने स्थानीयको भनाई छ ।