पर्यटकलाई दर्शन गर्न प्रतिक्षा गृह बन्दै

हुम्लाको नाम्खा गाउँपालिका वार्ड नम्वर ६ को लिमि लाप्चामा पर्यटकहरुको दर्शनका लागि पबित्र धार्मिक स्थल प्रतिक्षा गृह बन्ने भएको छ ।
मानसरोवर कैलाशको दर्शन गर्न सकिने नेपाली भुमी पर्यटीकय स्थल लाप्चामा प्रतिक्षा गृह बन्ने भएको हो । लाप्चा क्षेत्रमा मानसरोवर कैलाशको दर्शन गर्दा हावा हुरी, असिना पानी आउने भएका कारण त्यसबाट पर्यटकलाई जोगाउन उक्त गृह बन्न लागेको हो ।

लिमिको लाप्चामा पर्यटकहरुलाई मानसरोवर कैलाशको दर्शन गर्न सहज होस भन्ने उदेश्यका साथ सुबिधा सम्पन्न प्रतिक्षा गृह बन्ने भएको नाम्खा गाउँपालिका अध्यक्ष बिष्णु बहादुर लामाले बताए । सो क्षेत्रमा धेरै हावहुरी लाग्ने भएका कारण पर्यटकहरुलाई कैलाश मानसरोवरको दर्शन गर्न कठिन हुने भएपछि सहज होस भन्नका लागि गाउँपालिकाले प्रतिक्षा गृह बनाउन लागेको अध्याक्ष लामाको भनाई छ ।

प्रतिक्षालयमा बसेर पर्यटकहरुले सजिलैसंग दर्शन गर्न सकोस भन्दै प्रतिक्षा गृह बनाउन लागेको हो । अहिले पर्यटकहरुले मानसरोवर कैलाशको दर्शन हावा लाग्ने खुला स्थानबाट गर्दै आएका छन् । यसका लागि गाउँपालिकाले बजेटको ब्यबस्था समेत गरि सकोको छ । लाप्चामा प्रतिक्षा गृहसंगै सो क्षेत्रमा भ्यू टावर बनाउने कार्यक्रम समेत गाउँपालिका स्रोतले जनाएको छ ।

यसअघि हुम्लावासीले मात्र लाप्चाबाट मानसरोवर कैलाशको दर्शन गर्ने गरेका थिए भने यो वर्षबाट भारतीय पर्यटकहरुले समेत लिमिकै लाप्चाबाटै दर्शन गर्न सुरु गरि सकेका छन् । गत असोज यता दुई वटा समुहले लाप्चाबाटै मानसरोवर कैलाशको दर्शन गरेको छ । यसवर्ष लाप्चाबाट मानसरोवरको दर्शन गर्ने भारतीय र आन्तरिक पर्यटकहरुको संख्यामा बृद्धि हुन सक्ने सांकेत देखिएको छ ।