सिमकोटमा ट्याक्टर दुर्घटना

हुम्लाको सदरमुकाम सिमकोटमा ट्याक्टर दुर्घटना हुँदा चालक सहित चार जना घाइते भएका छन् । घाइते हुनेमा दुई जना महिला रहेका छन् भने चालक र सहचालकको अवस्था सामान्य रहेको छ ।

सुरक्षाकर्मिले उद्धार गरेपछि उनिहरुको जिल्ला अस्पताल हुम्लामा उपचार भइरहेको छ । खार्पुनाथ हुँदै स्याम्ने गाउँबाट दाउरा लिएर सदरमुकाम सिमकोट आउँदै गरेको लु ४ त १४४८ नम्बरको ट्याक्टर सदरमुकाम सिमकोटको काठेचुली सडकबाट तल खसेर दुर्घटना भएको हो ।

ट्याक्टर सवा चार बजे सदरमुकाम सिमकोटको काठेचुलीमा ट्याक्टर दुर्घटना भएको जिल्ला प्रहरी कार्यालय हुम्लाका असई कुमार गिरीले जानकारी दिए । स्याम्ने खोलाबाट दाउरा ल्याएर सदरमुकाम सिमकोट पुगेको ट्याक्टर काठेचुलीमा दुर्घटना हुँदा चारजना घाइते भएका छन् ।

घाइते हुनेमा सिमकोट वडा ६ का कामना रोकाया रहेका छन् उनको टाउँकोमा चोट लागेको छ भने, सोही वडाका मञ्जुला रोकायाको अनुहारभरी चोट लागेको प्रहरीले जानकारी दिएको छ ।

यस्तै सवारी चालक सर्केगाड ८ बस्ने निर्माण विक र सोही वडाका सहचालक सुरज विकको अवस्था सामान्य रहनुका साथै चालक र सहचालकलाई उपचानरपछि नियन्त्रणमा लिइने भएको छ । दुर्घटना के कारणले भयो भन्ने बारे अनुशन्धान भईरहेको प्रहरीले जनाएको छ ।