वीरेन्द्रनगरमा फोहोर व्यवस्थापनमा चुनौती

सुर्खेत : कर्णाली प्रदेशको अस्थायी राजधानी रहेको सुर्खेतको वीरेन्द्रनगरमा फोहोर व्यवस्थापनामा चुनौती दैखिएको छ।

प्रदेशकै ठूलो शहर वीरेन्द्रनगरमा दैनिक ३१ टन फोहोर निस्किने गरेको छ। जसमा ५७ प्रतिशत कुहिने र ४३ प्रतिशत नकुहिने फोहोर रहेको छ। नगरपालिकाको अध्ययनअनुसार नकुहिने फोहोरको मात्रा बढ्दै गएकाले व्यवस्थापनमा समस्या बढेको छ। वीरेन्द्रनगरमा दैनिक उत्पादन हुने फोहोरमध्ये आठ प्रतिशत रबर, १२ प्रतिशत प्लाष्टिक, चार प्रतिशत सिसा, ११ प्रतिशत कागज, चार प्रतिशत कपडा र चार प्रतिशत अन्य फोहोर रहेको छ। तीमध्ये ३० प्रतिशत फोहोर औद्योगिक क्षेत्र, ३५ प्रतिशत घर र ३५ प्रतिशत पसलबाट गरेको छ।

वीरेन्द्रनगर नगरपालिकाकी उपप्रमुख मोहनमाया ढकाल शिक्षित वर्गका परिवारले नै शहरमा चोकचोकमा फोहोर फाल्ने क्रम बढेको बताउँछिन्। यो क्रम तत्कालै नरोके वा वा बैकल्पिक उपाय खोज्न नसके आगामी दिनमा बजार दुर्गन्धित हुने उनको भनाइ छ।  वातावरण तथा विपत व्यवस्थापन समितिका संयोजक टोपबहादुर दर्लामी मगरले जनप्रतिनिधिहरुले फोहोर व्यवस्थापनका लागि पटक–पटक पहल गर्दा पनि स्थानीयबाटै असहयोग हुने गरेको बताए। वडा नं. १४ का अध्यक्ष समेत रहेका दर्लामाीले भने, ‘हामी नगरलाई स्वच्छ र सफा राख्ने कुरामा सधै सकारात्मक छौं, तर स्थानीयले नै सहयोग गर्दैनन्।’