कोरोना संक्रमितलाई हेलिकप्टर मार्फत उद्धार

नोवेल कोरोना भाइरसबाट संक्रमित सर्केगाड गाउँपालिका स्वास्थ्य संयोजक सन्तोष धामीलाई श्वाश–प्रश्वाशमा समस्या भएपछि हेलिकोप्टरमार्फत थप उपचारका लागी उद्धार गरीएको छ ।

बिहिबार वेलुका देखि जिल्ला अस्पतालमा राखिएको संयोजक धामीको स्वाश–प्रश्वाश ५० मा झरेपछि थप उपचारका लागि आज कर्णाली स्वास्थ्य विज्ञान प्रतिठान जुम्लामा लिइएको जनस्वास्थ्य कार्यालय हुम्लाका प्रमुख प्रेमबहादुर सिंहले जानकारी दिए ।

धामीको श्वाश–प्रश्वाशको अवस्था निकै संकटग्रस्थ हुनुका साथै अक्सिजन समेत कम हुँदा जिल्ला अस्पतालको व्यवस्थाले संभव नहुने भएपछि हेलिकोप्टर मार्फत जुम्ला उपचारका लागी लगिएको हो ।

धामीको उद्धारका लागी भक्तपुर इन्टरनेशनलबाट डाक्टर अविशेक देव र नर्स अनिसा किलम्बु टोली हुम्ला पुगेर जुम्ला लगिएको हो । संयोजक धामीलाई सिम्रीक हेलिकप्टर मार्फत जुम्ला उद्धार गरीएको छ ।

मंगलबार बिहान कोरोना परिक्षण गर्दा पोजेटिभ देखिएपछि रानीवन आइसुलेसन रहेका धामीलाई स्वास्थ्य थप समस्या देखिएपछि बिहिबार जिल्ला अस्पतालमा सारिएको थियो ।

कर्णाली प्रदेशका अन्य अस्पताल भन्दा कर्णाली स्वास्थ्य विज्ञान प्रतिठानमा चिकित्सक र अक्सीजनको हिसाबले पनि सम्पन्न भएकाले धामीलाई जुम्ला पठाइएको हो ।

सर्केगाड गाउँपालिकाका लागि एन्टिजेन किट र अन्य स्वास्थ्य सामाग्री लिन सिमकोट आएका धामीलाई मंगलबार गरिएको कोरोना परिक्षणमा संक्रमण पुष्टि भएको थियो ।