आगामि आर्थिक वर्षमा हुम्ला सदरमुकाम सिमकोट राष्ट्रिय राजमार्गमा जोडीने

हुम्लाको जिल्ला सदरमुकाम सिमकोटलाई आगामी आर्थिक वर्ष राष्ट्रिय राजमार्ग सञ्जालमा जोडिने भएको छ । शनिवार दिउँसो बजेट भाषणका क्रममा अर्थमन्त्री विष्णुप्रसाद पौडेलले हुम्लाको सदरमुकाम सिमकोटलाई आगामी आर्थिक वर्षमा राष्ट्रिय राजमार्ग जोडिने जानकारी दिनुभयो ।

नेपालका ७७ जिल्ला सदरमुकाम मध्ये ७६ वटा सदरमुकाम राष्ट्रिय सडक सञ्जालमा जोडिएका छन् भने हुम्लाको सदरमुकाम सिमकोट अहिलेसम्म जोडिन सकेको छैन् । सरकारका प्रत्येक वर्षको बजेट भाषणमा सिमकोटलाई राष्ट्रिय राजमार्गमा जोड्ने जनाएपनि अहिले सम्म जोडिन सकिरहेको छैन् । सरकारले सिमकोटलाई राष्ट्रिय राजमार्ग सञ्जालमा जोड्ने बताएपनि बजेट भने तोकेको छैन् ।

यस्तै आज सरकारले बजेट भाषणका क्रममा हुम्लाका सिमकोट सहित डोल्पाको तल्लो डोल्पा लगायतका क्षेत्रमा पदयात्रा मार्ग निर्माण गरिने जानकारी दिएको छ ।

जिल्लाको उत्तरी क्षेत्रमा रहेको नाम्खा गाउँपालिकाको यारी लाई सुक्खा वन्दरगाहको पूर्व तयारी सम्पन्न गरी निर्माण प्रारम्भ गरिनेभएको छ । यसैगरी सरकारले यारी, हिल्सा क्षेत्रलाई पहुँचमार्ग निर्माण तथा सुधारको लागि बजेटको व्यवस्था गरेको छ ।

हुम्ला सहित देशभरका सबै जिल्ला अस्पतालमा प्रसूति तथा नवजात शिशु स्याहार सेवा सञ्चालनमा ल्याइने भएको छ । मातृ स्वास्थ्यमा सुधार ल्याउन हुम्ला, डोल्पा, मुगु, बझाङ्ग लगायतका दुर्गम क्षेत्रका २० जिल्लामा प्रसूति समय अगाडिको स्वास्थ्य जाँच र औषधीको सुविधा सहितको मातृ प्रतीक्षा गृह सञ्चालन गरिनेछ जानकारी दिएको छ ।