हुम्लामा निषेधाज्ञा थप, उत्तरी नाम्खाको लिमीमा लकडाउन खुलाईयो

हुम्लामा चौथो पटक निषेधाज्ञा थप गरिएको छ । आज बसेको जिल्ला कोभिड संकट व्यवस्थापन समिति (डिसिसिएमसि) हुम्लाको बैठकले थप एक साता निषेधाज्ञा गर्ने निर्णय गरेको प्रमुख जिल्ला अधिकारी गणेश आचार्यले बताए ।

असार नजिकिएसँगै जिल्लामा यस अघि कडाई गरीएको निषेधाज्ञालाई केही खुकुलो बनाइने भएको छ । जनस्वास्थ्य सुरक्षाका मापदण्डको अनिवार्य पालना गरी दैनिक उपभोग्य वस्तु ( तरकारी,खाद्य,दुध,ग्यास ) आदिका पसलहरु विहान ठिक ७ बजेदेखि विहान १० बजे तीन घण्टासम्म खाद्यान्न खरिद, विक्री गर्न दिने भएको प्रजिअ आचार्यले बताए ।

बैंक तथा वित्तीय संस्थालाई भने १० बजेदेखि २ बजेसम्म खुला रहन दिइने भएको छ । यस्तै सरकारी तथा सार्वजनिक कार्यालयहरुले २५ प्रतिशत सम्म कर्मचारी प्रयोग गरी स्वास्थ्य सम्बन्धी सुरक्षाका मापदण्डहरु अवलम्वन गरेर सञ्चालन गर्न पाउने भएका छन् । बैठकले आज राती देखि यही असार २ गतेसम्मका लागि निषेधाज्ञा थप गर्ने निर्णय गरेको छ ।

नाम्खामा लकडाउन खुलाइयो
यस्तै जिललाको उत्तरी नाम्खा गाउँपालिकाको वडा नम्बर ६ को लिमीमा आजबाट लकडाउन खुल्ला गरीएको छ । वडाध्यक्ष पालजोर तामाङको अध्यक्षतामा बसेको बैठकले असारमसान्त नजिकीएसँगै कामको चाप बढी हुनेभएकाले लिमीमा कार्यरत सरकारी तथा गैरसरकारी कर्मचारीलाई आजबाट वडा नम्बर ६ लिमी प्रवेश गर्न पाइने भएको छ ।

तील, जाङ, हल्जी गाउँका अगुवाहरुको उपस्थितमा कर्मचारीलाई प्रवेश गर्न दिइने भएको छ भने अन्य भ्रमणमा आउने आन्तरीक पर्यटकलाई प्रवेशमा निषेध अथावत नै रहने भएको लिमी स्वास्थ्य चौकीका निमित्त कार्यालय प्रमुख लोकनाथ बोहराले बताए ।

वडा नम्बर ६ मा कार्यरत कर्मचारीलाई तल खुवाउनु पर्ने र विभिन्न योजनाहरुको काम गर्नुपर्ने भएका कारण अन्यलाई नागरीकलाई प्रवेश गर्न नदिइने भएको भएपनि कर्मचारीलाई प्रवेशमा आजबाट खुल्ला गरीएको निमित्त कार्यालय प्रमुख बोहराले जानकारी दिए ।

यस्तै खार्पुनाथ गाउँपालिकाको वडा नम्बर पाँचमा रहेको बाम्टामा समेत शिल खोलिएको छ । केही दिन अगाडी बाम्टामा परीक्षण गर्दा दुई जनामा संक्रमण पुष्टि भएको थियो उनीहरुलाई आज पुन परीक्षण गर्दा कोरोना रिर्पोट नेगेटिभ आएपछि शिल खोलिएको बताइएको छ । अब बाम्टामा वडा नम्बर पाँचका स्थानीय आवतजावत गर्न पाउने भएका छन् ।