७० वटा स्वास्थ्य संस्थाहरुलाई स्वास्थ्य सामग्री सहयोग

हुम्ली सेवा समाज नेपालगंजद्धारा हुम्ला जिल्लाका ७० वटा स्वास्थ्य संस्थाहरुलाई कोभिड १९ का सामग्री सहयोग गरेको छ । जिल्ला बाहिर नेपालगञ्जमा बस्दै आएका हुम्ली सेवा समाजमा आवद्ध करीव १४ जनाको संयुक्त आर्थिक सहयोगमा स्वास्थ्य जिल्लाका सम्पुर्ण स्वास्थ्य संस्थाहरुलाई सामग्री सहयोग गरिएको सिमकोट गाउँपालिका स्वास्थ्य शाखाका संयोजक दानबहादुर बोहराले जानकारी दिए ।

विश्वव्यापी महामारिको रुपमा फैलिएको नयाँ भेरियण्ट सहितको कोभिड–१९ को संक्रमण दिनानु दिन तिव्र गतिमा फैलिरहेको अवस्थामा हिमाली जिल्ला हुम्लाका सम्पुर्ण स्वास्थ्य संस्थाहरुलाई उक्त सामग्री सहयोग गरिएको नेपालगञ्जमा बसोबास गर्दै आएका सिमकोट गाउँपालिका वार्ड नम्वर ५ का जीवन बोहराले बताए ।हुम्लामा भौतिक पूर्वधार, स्रोत साधन र जनशक्तिको अभाव लगायतका विभिन्न प्रतिकुल अवस्था र महामारिको विषम परिस्थितीलाई मध्य नजर गर्दै थोरै भए पनि केही सहज होस भन्ने उदेश्यका साथ हुम्ली सेवा समाजले उक्त सामग्री सहयोग गरेको हो ।

जिल्लाका सिमकोट, नाम्खा, खार्पुनाथ र सर्केगाड गाउँपालिका स्वास्थ्य संस्थाहरुका लागि हवाइ जहाज मार्फत जिल्लामा आपुर्ति भएको छ भने ताँजाकोट, अदानचुलि र चंखेली गाउँपालिकाहरुका लागि पैदल मार्ग हुँदै जिल्लामा उपलव्ध हुने संयोजक बोहराको भनाई छ । संयोजक बोहराका अनुसार जेठ २६ गते हवाई जहाज मार्फत आपुर्ति भएको स्वास्थ्य सामग्री सिमकोट गाउँपालिका वार्ड नम्वर ६ को वडा कार्यालयबाटै सिमकोट गाउँपालिका अन्तरगतका ठेहे, बरगाउँ, स्याँडा, खोल्सी, लगायतका स्वास्थ्य संस्थाहरुमा वितरण गरिएको थियो ।

त्यस्तै सर्केगाड गाउँपालिका र जिल्ला अस्पताललाई पनि सोही दिन उक्त सामग्री हस्तान्त्रण गरिएको संयोजक बोहराले बताए । सहयोग गरिएका सामग्री मध्ये प्रति स्वास्थ्य संस्थालाई एक थान पल्स अक्सिमिटर, एक थान डिजिटल थर्मो मिटर र ५ सय पिस सर्जिकल मास्क उपलव्ध गरिएको थियो । जिल्लामा कोभिड १९ को भयावह भएको अवस्थामा नेपालगञ्माबाट उक्त सामग्री जिल्लामा पठाएकोमा जिल्ला अस्पताल तथा सिमकोट गाउँपालिका स्वास्थ्य शाखाले सहयोगी व्यक्तिहरुलाई धन्यबाद समेत दिएको थियो ।