कोभिड–१९ संक्रमित र अग्रपङतिमा खटिएका कर्मचारीलाई आयुर्वेदिक औषधि वितरण

कोभिड–१९ संक्रमित र अग्रपङतिमा खटिएका कर्मचारीलाई आयुर्वेदिक औषधि वितरण गरिएको छ । सातौँ अन्तराष्ट्रिय योग दिवसको अवसर पारी हुम्लाको रानीवन स्थित आइसोलेशनमा रहेका स्वास्थ्यकर्मी, सुरक्षाकर्मी र कोभिड–१९ बाट प्रभावित बनेका संक्रमितहरुलाई रोग प्रतिरोधात्मक क्षमता वृद्धिका लागि औषधि वितरण गरिएको हो ।

स्वास्थ्यका लागि योग भन्ने नाराका साथ स्वास्थ्य सेवा कार्यालय आयुर्वेद शाखाको आयोजनामा असार ७ गते (सोमवार) अन्तराष्ट्रिय योग दिवस मनाउनुका साथै आइसोलेशनमा रहेका कोरोना संक्रमित र क्वारेन्टाइनको व्यवस्थापनका लागि अग्रपङतिमा खटिएका सुरक्षाकर्मी, स्वास्थ्यकमी र कोभिड–१९ संक्रमितहरुलाई सो औषधि वितरण गरिएको थियो ।

आइसोलेशनमा रहेका संक्रमितहरुलाई निग्रानी गर्ने पाँच जना स्वास्थ्यकर्मी, पाँच जना सुरक्षाकर्मी र ३ जना कोरोना संक्रमितलाई रोग प्रतिरोधात्मक क्षमता बढाउने उदेश्यका साथ अश्वगन्ध चुर्ण र इमुनो केयर आयुर्वेदिक औषधि वितरण गरिएको सोही कार्यालयका प्रमुख कृष्णचन्द जोसीले बताए । उक्त शाखा कार्यालय हुम्लाको टोलिले स्वास्थ्य मापदण्डको पालना गर्दै रानिवनमा रहेको क्वारेन्टाइन तथा आइसोलेशनमै पुगेर सो औषधि वितरण गरेको थियो ।

त्यसै गरि हाल स्वास्थ्य सेवा कार्यालय आयुर्वेद शाखामा करीव २५ लाख रुपैयाँ बरावरको आयुर्वेदिक औषधि इष्टकमा रहेको सो कार्यालयका प्रमुख जोसिको भनाई छ । सेवाग्राहीको आवश्यक्ता अनुसार आफुले जतिवेला पनि उपयुक्त औषधि उपलव्ध गराउने प्रमुख जोसिले प्रतिवद्धता जनाएका थिए ।