सुत्केरी हुन नसक्दा हेलिकप्टरबाट उद्धार

सिमकोट । जिल्लाको अदानचुली गाउँपालिका वडा नम्बर पाँच बारी गाउँका २१ वर्षिय गर्भवती सुनकेशा रावललाई सुत्केरी व्यथा लागेर बच्चा जन्माउन नसक्दा आज उद्धार गरीएको छ ।

तीन दिनदेखि सुत्केरी व्यथा लागेर बच्चा जन्माउन नसक्दा थप उपचारका लागी रावलको नेपाली सेनाको हेलिकप्टरबाट शुक्रबार अपरान्ह जिल्ला बाहिर उद्धार गरीएको जिल्ला अस्पताल हुम्लाका सिनियर अनमी सरिता बोहराले जानकारी दिईन् ।

रावलको अवस्था नाजुक भएपछि नेपाली सेनाको हेलिकप्टरबाट अहिले उद्धार गरेको अनमी बोहराले बताईन् ।

गाउँमा रहेका स्वास्थ्यचौकीमा जटिल केसका विरामीको लागी स्वास्थ्य उपकरण नहुँदा समयमै उद्धार नहुँदा कतिपय महिलाले अकालमै ज्यान गुमाउनु परेको छ ।

महिला, बालबालिका तथा ज्येष्ठ नागरिक मन्त्रालयकोे राष्ट्रपति महिला उत्थान कार्यक्रम अन्तर्गत नेपाली सेनाको हेलिकोप्टरबाट शुक्रबार अपरान्ह करिब ५ बजे सुत्केरी महिलाको उद्धार गरिएको अदानचुली गाउँपालिकाका अध्यक्ष दल फडेराले जानकारी दिए ।