हुम्लामा हिमपात, दिउसै माईनस १० डिग्रीमा तापक्रम

सिमकोट । आईतबार हुम्ला जिल्लामा फेरी हिमपात सुरु भएको छ । हिमपात हुँदा दिउसै तापक्रम माईनस १० मा पुगेकाे छ भने चिसो अत्याधिक बढेको छ ।

बिहानबाटै बादलले आधा ढाकेको भए पनि १० बजेबाट हिमपात सुरु भएको स्थानीयबासी नन्द सिंहले बताए । हिउँ गतिलो किसिमले नपरे पनि चिसो भने अत्याधिक बढेको उनले बताए । हिउँ पर्न सुरु भए पछि सरकार कार्यालयमा कर्मचारीहरु आगो बोलर कार्यालय कुरि रहेका छन् भने सेवाग्राहीहरु पनि कार्यालयमा फाट्ट फुट्ट आएको कर्मचारीहरुले बताए ।

यता ब्यापारीहरुले पनि पसलको अगाडी आगो तापेर ब्यापार गरि रहेका देखिन्छन् । चिसो बढे पछि सिमकोट बजारमा बाक्ला ज्याकेट, टोपी, मोजाको बिक्री बढेको ब्यापारी लोकेन्द्र रावतले बताए ।

हिमपात माथिल्लो हुम्लाको चाला, मुचु, यारी, नारा, न्यालु, लिमी लगाएका स्थानमा भने बाक्लो हिमपात परेको छ । हिमपात बाक्लो पर्दा लिमी र हिल्सा आउजाउ बन्द भएको छ । आईतबार यातायातको एक मात्र साधन हवाई यातायात पनि सुचारु हुन सकेन ।