हुम्लामा हवाई सेवा अवरुद्ध

सिमकोट । हुम्लामा मौसममा आएको फेरबदलसँगै अन्तर जिल्ला जोड्ने एक मात्रै छोटो दुरीको हवाई सेवा अवरुद्ध भएको छ । शुक्रबार राती जिल्लामा हिमपात हुँदा त्यस यतादेखि हवाई सेवा अवरुद्ध भएको सिमकोट विमानस्थल स्रोतले जानकारी दिएको छ । साथै आइतबार राती जिल्लामा हावाहुरी चल्दा सोमबार उडान हुन नसकेको जानकारी प्राप्त भएको छ ।

सोमबार जिल्लाको मौसम सफा रहेपनि रातीदेखि विहान ११ बजेसम्म हावाहुरी चलेका कारण उडान हुन नसकेको सिमकोट विमानस्थलका प्रमुख महेन्द्र सिंहले बताउनुभयो । मौसम सफा रहेपनि हावाहुरी नचलेमा मंगलबार उडान हुने भएको कार्यालयका प्रमुख सिंहले बताउनुभयो । विमानस्थलको रनवेमा जमेको हिउँ पग्लिए पनि हावाहुरीका कारण उडान हुन नसकेको बताइएको छ । साथै जिल्लामा तीन दिनदेखि नेपालगञ्ज, सुर्खेतबाट उडान नहुँदा यात्रुले ओहरदोहर गर्न नपाएको बताइएको छ ।

सिमकोटबाट यहाँका नागरीक उडान नहुँदा जिल्ला बाहिर जान नपाएका हुन् । भने नेपालगञ्ज सुर्खेतबाट पनि यात्रु हुम्ला पुग्न नसकेको बताइएको छ । हुम्लादेखि नेपालगञ्ज सुर्खेत जानका लागि छोटो दुरी भएकाले विमानस्थलमा जिल्लाका विभिन्न शहर जाने यात्रुको चाप समेत बढेको बताइएको छ । यस्तै उडान नहुँदा दैनिक उपभोग्य देखि विकास निर्माणका सामग्री ढुवानी हुन नसकेको जानकारी प्राप्त भएको छ ।