ओझेलमा रलिङ् पर्व

पर्यटकीय सम्भावना बोकेर पनि उचित प्रचार प्रसारको अभावले हुम्लाको सिमकोट गाउँपालिका वडा तीन मा रहेको महत्वपूर्ण पर्यटकीयस्थल “रलिङ्” ओझेलमा परेको छ ।

पर्यटकीय सम्पदा भएपनि आन्तरिक व्यवस्थापनको अभाव, व्यवस्थित पदमार्ग नहुनु, होमस्टे सञ्चालनमा नआउनु, प्रचारप्रसारको कमी तथा पर्यटन सूचना केन्द्रको अभाव, सुरक्षा चुनौती लगायतका कारण पर्यटकीयस्थल ओझेलमा परेको हो ।

रमणीयस्थल रलिङ् क्षेत्रमा पर्यटन विकासका पूर्वाधार तयार नहुँदा पर्यटन प्रवद्र्धन हुन सकेको छैन । वर्षको एक पटक मात्रै यो क्षेत्रमा जेठको पुर्णिमाको समयमा तिर्थ यात्री दर्शनका जाने गर्दछन् । उच्च क्षेत्रमा अवस्थित रलिङ्ग गुम्बा प्राकृतिक सौन्दर्यले भरिपूर्ण एक प्रमुख गन्तव्य पनि मानिन्छ । पहाडी भू–भागमा रहेका कारण सूर्योदय अवलोकनका लागि पनि उत्तिकै महत्वपूर्ण छ ।

जेठ पुर्णिमा रलिङ्ग गुम्बामा दर्शनका लागी जिल्लाभरीका नागरीक यहाँ पुगेर भगवानको दर्शन गर्ने गर्दथिए भने यो वर्ष नेपाल सरकारले चैत ११ गते देखि लकडाउन गरेपछि झनै ओझेलमा परेको छ ।

रलिङ् गुम्वासम्म पुग्नको लागी यातायातको असुविधाका कारण यहाँ पुग्न निकै कठिनाइ हुने गरेको भएपनि रलिङ् आसपासका क्षेत्रबाट करिब तीन देखि चार घण्टाको पैदलमा हिडेर पुग्ने गरीन्छ ।

चौबीसै घण्टा शीतल हावा बहिरहने रलिङ् गुम्वामा पुगेपछि जोकोही त्यहाँको भौगोलिक अवस्था एवं दृष्यावलोकनबाट लोभिन्छन् । “पर्यटकीय सम्भावना छ, तर राज्यको लगानी खासै नहुँदा अझै पनि फस्टाउन सकेको छैन” यसका लागि स्थानीय सरकारको लगानी जरुरी छ ।”